Azeddine Berkouk Acennay Amezwaru n temnaḍt n Uweqqas

Ihi Mass Azeddine Berkouk, d acennay amenzu n temnaḍt n uweqqas, d netta i yerẓan asalu i tezlit taqbaylit, acku deg wakud-nni deg tmetti-nneɣ d lɛib ad yecnu yiwen, yerna ttwalin acennay s yir tamuɣli. Lḥaṣun mačči d yiwet i yesɛedda. Dda Ɛezdin ilul deg taddart n Ayt Ɛisa (Aweqqas-Bgayet), deg tmurt n yiqbayliyen. Yekcem deg unnar n ccna seg-mi yella d abeztuḥ deg yiseggasen n 70. Yella icennu akked Mas Allawa Rabḥi i yuɣalen ass-a d aduktur n tutlayt d yidles n tmaziɣt akked Naṣir Medjdoub i yellan ass-a d amyaru, d amnadi ilelli. Ihi Dda Azeddine, yekka-d aṭas n tudrin tiqbayliyen, yecna deg-sent taqbaylit tazeddgant ḥemmlen-t akk yimdanen, deg yimi-s dayem awal n tizeḍt i d-yettefɣen. Ayeni d-irennun tumert dakken yekker-d s yicewwiqen n yemma-s akked tezlantin n yinaẓuren iqbayliyen imeqqranen am Dda Slimane Azem akked Dda Ṣaleḥ Sadaoui.
Ihi deg useggas n 1984 yessufeɣ- d tasfift-is tamenzut, ma d tis-snat deg useggas n 1986, dɣa seg yimir ur d-yessufeɣ tasfift. Ikemmel tizlit deg uzayez ɣer wayeḍ ? yerna yefka afus n tallelt akked uweṣṣ i waṭas n yilemziyen i yekcmen abrid n cna. Yerna yelddi allen i waṭas n yimdanen.
Salim Bellouz d acennay awḥid i yerran tajmilt i ucennay-nneɣ.
Ihi, seg-mi yerẓa Dda Azeddinz asalu i tezlit taqbaylit deg temnaḍt n uweqqas, aṭas i d-yernan kecmen abrid-a n tezlit, gar-asen Lmadjiid Adrar, Ait Ikni Boualem, Chekkal Laziz, Maamache Brahim, Ṭaher Aïsi, Djouder Ḥammou akked uletma-s Ḥmama, Agraw Isaffen,Tatiche, akked wiyaḍ.
Ma deg taggara, ad greɣ tiɣri i tdukliwin tidelsanin n temnaḍt n uweqqas ad rren-t tajmilt i Dda Azeddine acku yuklal asnemmer, yerna yenḥaf aṭas. Ihi ad nekfu s yiwen n ubruy n Dda Azeddine i
D as-yeqqar :
S lḥif d lemḥan
I ttɛeddin wussan
Nettxellis ayen ur nexdim
Deg ddunit yekfa laman
Teɣḍer-iyi d amezyan
Lmektub anda yeqqim