Ɛezdin Berquq : Acennay Amezwaru n temnaḍt n Uweqqas

Ɛezdin Berquq : Acennay Amezwaru n temnaḍt n Uweqqas
Ihi Mass Ɛezdin Berquq, d acennay amenzu n temnaḍt n uweqqas, d netta i yerẓan asalu i tezlit taqbaylit, acku deg wakudnni deg tmetti-nneɣ d lɛib ad yecnu yiwen, yerna ttwalan acennay s yir tamuɣli, lḥaṣun mačči d yiwet i yesɛedda. Dda Ɛezdin ilul deg taddart n ayt Ɛisa (Aweqqas-Bgayet), deg tmurt n yiqbayliyen, yekcem deg unnar n ccna seg-mi yella d abeztuḥ deg yiseggasen n 70,yella icennu akked Mass Ɛellawa Rabḥi i yuɣalen ass-a d aduktur n tutlayt d yidles n tmaziɣt AK D Naṣir Meǧdub i yellan ass-a d amyaru,d amnadi ilelli, ihi Dda Ɛezdin yekka-d aṭas n tudrin tiqbayliyen, yecna deg-sent taqbaylit tazedgant ḥemmlen-t
akk yimdanen, deg yimi-s dayen awal n tizeḍt i d-yettefɣen, ayen
i d-irennun tumert dakken yekker-d s yicewwiqen n yemma-s akked tezlantin n yinaẓuren iqbayliyen imeqqranen am Dda Sliman Ɛazem akked Dda Ṣaleḥ Seɛdawi.
Ihi deg useggas n 1984 yessufeɣ- d tasfift-is tamenzut, ma d
tis-snat deg useggas n 1986, dɣa seg yimir ur d-yessufeɣ tasfift
ikemmel tizlit deg uzayez ɣer wayeḍ yerna yefka afus n tallelt
akked uweṣṣi waṭas n yilemziyen i yekcmen abrid n cna,yerna
yelddi allen i waṭas n yimdanen.
Salim Belluz d acennay awḥid i yerran tajmilt i ucennay-nneɣ,
ihi seg-mi yerẓa Dda Ɛezdin asalu i tezlit taqbaylit deg temnaḍt n uweqqas,aṭas id yernan kecmen abrid-a n tezlit gar-asen Lmaǧid Adrar, Ayt Ikni Buɛlam, Cekkal Lɛaziz, Meɛmac Brahim, Ṭṭaher Ɛisi, Ǧuder Ḥammu akked uletma-s Ḥmama,Agraw Isafen,Tatic, akked wiyaḍ.
Ma deg taggara ad greɣ tiɣri i tdukliwin tidelsanin n temnaḍt n uweqqas ad rren-t tajmilt i Dda Ɛezdin acku yuklal asnemmer,
yerna yenḥaf aṭas, ihi ad nekfu s yiwen n ubruy n Dda Ɛezdin i
das-yeqqar :
S lḥif d lemḥan
I ttɛeddin wussan
Nettxellis ayen ur nexdim
Deg ddunit yekfa laman
Teɣḍer-iyi d amezyan
Lmektub anda yeqqim
Akli Ayt Iɣil wis