Ajdid di tira: Inig aneggaru n Brahim Tazaghart

Rnant-d, ussan-a, tezrigin Tira sser i tsekla taqbaylit. Ɣas ulamma dacdac kan i teddunt temsal, ladɣa deg wayen yeɛnan ungalen, “Inig aneggaru” d kra n wungalen nniḍen d inagan ɣef tezmert n “tutlayt

timawit” i usecbeḥ n tira, n...tsekla.

“Inig aneggaru”d inig daɣen di tudert n yal ass, s tutlayt n yal as. D inig deg iḥulfan, deg ulawen yenḥafen... “Inig aneggaru” mačči d yiwen : d inigen ara waṭas n “yimekwan” i ɣef yesmar Brahim tafat n...Tziri.

Atan cwiṭ seg waṭas : Serseɣ aɣmis ɣef ṭṭabla. Ddmeɣ-d agirru, ssaɣeɣ-t. Jebfeɣ sin n yijebbiden, usuɣ. Fkiɣ afus-iw ayeffus, sefḍeɣ imi-w, syin lḥan iḍuḍan-iw ɣer umgraḍ-iw i yeqqnen tazibba n lfeṭṭa tarqaqt, kemzeɣ.

Sdat-i Tiziri, tessusem, tessikid ɣer tama n yilel am tin yesmuzguten i tiɣri. Nekk, am win yetturaren Pyanu, kkateɣ s yiḍuḍan-iw ɣef ṭṭabla.

“Amer ur yettili wass-a, zemreɣ ad zenzeɣ akal iyi-d-yeǧǧa baba, ad fkeɣ azal-is d tarzebt i yiɛeggalen n mektub. Ass yecban ass-a, ur yelli d ass am wiyiḍ. Deg wass am wass-a i yeffeɣ ufellaḥ ayla-s, i teǧǧa tsedda tarwa-s, i tizzer tefruyt n leɣder deg wul n bu nniya”

Ukiɣ s wul-iw yerfi, yettniẓẓif am uḍaḍ tḥuza tyita n tefḍist. Xenqen-iyi yimeṭṭawen yettmuruden deg tgerjumt-iw.

“D imelyunene n yimdanen i yellan ɣef wudem n lqaɛa. Gar-asen merra, gar wid i d-ilulen i tafrara, d wid i d-ilulen i tallest n yiḍ, d nekk i yeqqimen da, di tlemmast n lhejna ineṭtawen deg yijufar-iw... Nek aqel-i da, deg unafag i iḥedren i tsiswa mi gezzrent, i wulawen mi selxen, i tirga mi ǧǧuǧgent, i rwaḥ mi yuɣal d tifrat, d talalit tamaynut... Nek aqel-i deffir n ṭṭabla, ɣɣareɣ aɣmis ttkeyyiffeɣ am uqadus, nettat, wiqqen anda tewweḍ tmuɣli-s, wissen anda leḥqent tirga-s ? Nekk d amsaɛef, d allel, d taɛrurt terkeb iwakken ad taweḍ ɣer lebɣi-s... Maca ccah, ccah deg-i !! Yak ayen ixeddem umdan iwayeḍ yettuɣal-as. Yak akken yesru, ara ten-iru s lɛejjlan neɣ s leɛḍil... Seg wass-n i mlalaeɣ Tiziri i ffiɣ tidi n wul-iw ɣer wurrawen-is, i zewǧeɣ yid-s, i ttuɣ ttxamim ɣef tayeḍ... Am zun iɛedda useffaḍ ɣef xxfawa-w, temḥa deg temwiḥt n tmeddurt-iw... Ass-a ɣef tizi n rrwaḥ d tɣimit, terza_d ɣer wallaɣ-iw. Terza-d Nayla, tajeǧǧigt i icebḥen tiferkiwin n temẓi-w.

Qemceɣ allen-iw.

“Anda-tt, anda i as-bran wussan i tin ǧǧiɣ gar yiberdan ass-n iyi-izzi udrum am uglaf n warẓaẓen. Ggullen yiɛeggalen-is ar d iɛeddi wawal-nsen, ar d dduɣ akken teddun, akken ddan yimezwura, ma ulac...!”

Seg Inig aneggaru (isebtar 14 d 15)

http://www.depechedekabylie.com/ddk-tamazight/117761-inig-aneggaru-n-brahim-tazaghart.html