Yella-d tura wayen γef ara neddakel

Yella-d tura wayen γef ara neddakel


Di tmura iɣ ifaten am tiḍ n Leurope, tugdut tettak-d izerfan i merra imdanen, i wakken ad fernen ayen i sen-yehwan seg kavaren isertiyen, neɣ ad snulfun tiktiwin d tdukliwin ara d ifrun ignuyen i tceɣiven timeti-nnsen.

sɣur Kader Dahdah



Deg useggas n 1988 mi yeldi udavu azzayri tagnit tagdudant , nekni iqvayliyen nebḍa ɣef sin ikabaren igdudanen. Azgen yedda d ukavar inemlayen (FFS) azgen nniḍen d ukavar adelsan agdudan (RCD). Tutlayt-nneɣ d tugdut , d isenfaren imeqranen igejdanen i iceɣɣben aɣref d tmeti-nneɣ. Σeddan 22 iseggasen n temɣensa deg sin ikavaren-a igdudanen ur d-newwi s yessen tugdut neɣ izerfan n tutlayt.

Acuɣer ? Axater ur neddukel ani (ara) xersum ɣef izerfan-neɣ utlaynen. Deg tsertit Fransa mi ara d-tili tayeffust deg udavu merra ikavaren n tzelmat ad ddaklen mgal -is. Ma daḍɣa d tzemalt i yettfen adavu merra ikavaren n tyeffust ad ilin mgal-is. Nekni ikavaren "igdudanen"-neɣ ulac ula d yiwen was i dduklen mgal adavu,yalas segdalen gar-asen.

Amussu n tmanit maci am ikavaren niden, d amussu yeldin i merra iqvayliyen ɣas ma llan deg ikavaren nniden. Amussu-a ifkad anavad aqvayli n vizman (uεḍil) akken ad yili d amḥaddi ɣef merra iqvayliyen. Merra-nneɣ iwwi-yaɣ-d ad ntekki deg umussu n tmanit d ad nsillel anavad-a-nneɣ, alama sqecred izerfan-nneɣ(timanit). Syin akin yal yiwen izemmer ad yeqqel ɣer ukavar-is, neɣ ad nesnerni ikavaren isertiyen iqvayliyen imaynuten am ukavar agdudan aqvayli, neɣ akavar amagdu aqvayli.

Aggagen , imyura, imusnawen, inazuren ssufɣen tamurt n fransa seg tallast ɣer tafat di tallit n tegrawla -s n 1789. Ihi, aggagen iqvayliyen, d nutni umi yessefk ad ilin d lemri n tmeti-nneɣ, d IMEDIATEN i tekcumi ɣer umusu n tmanit akken ad defren merra iqvayliyen. Maca nutni atas degsen kukran, aḍar ɣer zdat weyeḍ ɣer deffir. Wa yugad adavu,wayeḍ yugad ɣef temkant yettef naɣ ɣef tarwa-s, wiyaḍ vɣan ad ilin snnig merra iqvayliyen....atg.

Ma yella-d ummussu n tmanit nniden asirem-nneɣ ad igrurev, aɣ tedru am wayen iεddan,vɣiɣ ad iniɣ am ivawen ɣef usɣar. Adavu aḥraymi dayen ig ttḥuf, ad yaf avrid akken ad yekkes drus n izerfan i nesεa. Deg 1954 amusu n teslullit Azzayri FLN yessawed ɣer iswi-ines mi yekkes amussu n MTLD,yeqqim-d kan iman-is isdukkel merra izzayriyen ɣer imenɣi mgal tamhersa tafransist. Nekni daɣen ass-a aqlaɣ deg tegrawla tamelwit (war trad) mgal adavu, anda nessutur afellay izerfan wissen ad nekkes adday degsen.

Σmer Imac d agrawliw ameqran, d netta i d-isnulfan deg useggas 1926 di tmurt n fransa itri n tefriqt ugafa ɣef tebna tegrawla tazzayrit. Argaz-a d win yuta lḥif d ccer ɣer uqeruy maci ɣer uεebuḍ. Mi d-yeffeɣ seg lmizirya di tmurt, yewweḍ ɣer fransa yeččat wul-is yennuɣ ɣef izerfan n watmaten-is yeğğa di tmurt. Σmrer Imac iwwid ad yili d amedia i merra iqvayliyen iminigen aken ad kecmen annar n tsertit d umennuɣ ɣef izerfan n uɣref-nneɣ yettwaḥqren.

Ma d abeddel n yisem i tmurt-nneɣ d tikti yelhan , d tin ara yafen amkan-is deg usqasi seld (areqal) timanit. Ur nezmir ani ass-a ad as-nbeddel isem, tazwawt, tamazɣa talemmast, numidia, neɣ tanudmit ayakka nettat tella sddaw temhersa, ayakka adavu mazal-it isenta tuccar-is degs. Nzemmer kan ad nefk tiktiwin d iwellihen yelhan i imal am wid d-ifka umaray Akli Azwaw. Dayen kan aɣref aqvayli s tefranin neɣ s wemni -ines i isεan azref aken ad ibeddel isem i tmurt-neɣ.

I waken a nessaweḍ ɣer iswiyen-nneɣ yessefk ad neslelli tamurt taqvaylit, d wad nerr arraw-is d imḍebren fell-as s wallalen n unavad-a. D nutni kan izemren ad ilin d-imḥadden yelhan fell-as.

Tudert i unavad aqvayli n vizman. Tudert i uɣref Aqvayli.


http://www.tamurt.info/yella-d-tura-wayen-%CE%B3ef-ara,543.html?lang=taq