Ccix yetwattfen seg wanzaren

taqsiṭṭ n Ccix iran ad yerr Imezdaɣ n taddart n Tfernin d inselmen. Iruḥ asen‑isselmed tazallit, at taddart akk usan‑d. Maca yedrad wayen i d‑yeḍran, yerfa yenna‑yasen :" Ruḥet a yat Tfernin awer tlemdem tazallit ! Ma εawdeγ ad qqleγ γur‑wen !"

sɣur Kader Dahdah



Zik mi d-tekcem tesγent (ddyana) tineslemt γer tefriqt ugafa , Tamazγa talemmast (tamurt taqvaylit) tegra-d d taneggarut acku inselmen ufan-d iγalen imhaddiyen n iqvayliyen d teqvayliyin mgal -nsen.

Tasγent tineslemt yuεer-as ulḥam γer zdat γef wakal n tmazγa talemmast, acku arraw-is ttfen deg tensayin-nsen d tesγnin-nsen.

Aεraven inselmen mi ẓran yella-d uγilif ssulin yiwen wahil, dakken ad teddun seg taddart γer tayeḍ s ukukru. Mi ad d-sveddlen imezdaγ n yiwet n taddart seg tesγent-nsen (tamasiḥit, tudayt, war tes&ent...) γer tesγent tineslemt s tarrayt n zzur neγ n levγi, ad rjun din-a kra n wayyuren, akken ad ceyyεen yiwen umnay i taddart nniḍen.

Ass-n mi d-wwḍen γer taddart n Iγilwis qqimen din-a ugar n useggas akken ceyyεen yiwen n ccix ad yeselmed lislam i imezdaγ n taddart n Tfernin tin-a dγa iquvlen Iγilwis.

Mi yewweḍ ccix-nii, zzin-as-d merra at tfernin,yenna-yasen :
Tessnem dacu d lislam ? Yerra-as umγar n taddart :
nesla yes lameεna ur t-nessin-ani akken i wata. Ccix yeddem awal yenna :
Usiγ-d akken ad awen-slemdeγ tazallit s wacu ara tkecmem ar lğennet. Dayen yelhan, ulac aγilif, nekk ad iliγ zdat-wen, xedmet d thedrem am nekkini. Ayen ara d-iniγ εawdet-ett, mi d-rekεeγ rekεet ula d kunwi am nekk, teshel tzallit.

Yerra-as umγar n taddart :
Dayen i sehlen, yerveḥ, aqlaγ deffir-k a ccix, ahawt ad nali γer wanag n teεrict.

Taεrict-nni yellan snnig n uddaynin, temmug(tga) s uṣγar n wulmu.

Ttfen merra imukan-nsen, ccix d amezwaru, inelmaden n tzallit deffir-s. Mi yerkeε rrekεa tamezwarut, defren-t inelmaden, ḥerrken deg tigawt iṣγaren n taεrict,mzeyyren gar-asen, ttfen anzaren n ccix-nni. Yefka tiγri s ẓẓur d teqreḥ :
Ah a lmumnin ttwatfeγ seg wanzaren ! Ah a lmumnin ttwatfeγ seg wanzaren ! Inelmaden suγen daγen am netta :
Ah a lmumnin netwattef seg wanzren ! Ah a lmumnin netwattef seg anzaren ! Ccix yetwaqreḥ nezzeh,yenna :
ḥevset tazallit d tasem-d selket-iyi, ttwatfeγ ! Inelmaden tεawaden kan ayen asen-d-yenna ccix acku γillen akken kan i d tazallit :
Ah ! ḥevset tazallit d tasem-d selket-aɣ, nettwattef ! Usan-d imezdaγ merra, ula seg Iγilwis d Vuεmmara d Tgubba slan-d i usuγu-nsen.

Ulin kra n yergazen n at Iγilwis yezran d acu yellan acku ssnen tazallit. Mi s-d-vran ufan anzaren-is gezmen.
Ccix yerfed awal s lefqeɛ yenna-yasen :
Ruḥet a yat Tfernin awer tlemdem tazallit ! Ma εawdeγ ad qqleγ γur‑wen !

Akken at Tfernin gran-d d ineggura deg usveddel γer tesγent tineslemt.


http://www.tamurt.info/ccix-yetwattfen-seg-wanzaren,649.html?lang=taq