aygher timanit n tmurt n Yiqbayliyen ?

Timanit tamnaḍant



Seg mi tewwi Lzayer timunent aseggas n 1962, tilelli i xellṣen teḥma Yizayriyen, aladγa tamurt n Yiqbayliyen yefkan irgazen-is d tlawin-is ifazzen s tebγest d yiseγ d tezdeg, swayes ṭṭfen sser n yidurar d laman d leɛnaya n tudrin-is, mazal tamurt-a n Yiqbayliyen tettnaγ i ugerrez n Lzayer.

Mazal cfawa γef terkaf n yirgazen iqbayliyen inuḍḥen, yessudsen akabar n PPA-MTLD ama di Fransa niγ ma di Lzayer.
Mačči akka kan ma ula d tira n Tiγri n Umenzu n Wunber 1954 d usenker n tegrawla n teslulit ḍran-d deg Iγil Imula, yiwet n taddart n Iwaḍiyen n tmurt n Yiqbayliyen, γur umjahed Σli Zaɛmum yellan gar yimezwura yulin s adrar di Lzayer.

Necfa-yas daγ merra i yigiman (luluf) n Yiqbayliyen yeğğan tudrin-nsen, ixxamen-nsen, arraw-nsen, akal-nsen, ulin akk s adrar, mačči ala irgazen n Lwilaya III, ula d Iqbayliyen izedγen di temnaḍin-nniḍen n tmurt n Lzayer fkan tayet i tegrawla am di Lzayer talemmast, niγ wid i tt-isnekren γur-sen am di Wehran anda dγa di tallit-nni n lgirra, imezdaγ iɛrabawalen qqaren : « Wac bihum zwawa mɛa Legwar ? ».

Timenγiwt n Σebban, imenγi alsisan :

Mazal di cfawa Irgazen am Uɛemran, Bennay, Σmiruc, Krim, Σebban, d yimeγrasen akk ur nettwassen yefkan iman-nsen d asfel deg unnar n ṭṭrad n tselulit.
Inmazrayen akken ma llan, nnan-d belli d Σebban, Argaz-a meqqren, ay d aqerru n tegrawla ; d netta ay as-igan azal, d netta a s-yebnan llsas, a s-inejren abrid ara tawi tegrawla γer zdat ; d netta ay d-yesdukklen merra imeγnasen γef taluft taγelnawt, yerna-d s annar ula d wid-nni ikukran am lɛulama lmuslimin d Yizduklanen.
Argaz-a yellan d mmi-s n Iɛezzuzen n Larbɛa n At Yiraten, d win i d-yesɛeddan 05 n yiseggasen di lḥebs n Fransa. Mi d-yeffeγ, inuda merra akal n Lzayer bac ad iqenneɛ imeγnasen anis bγun ilin, ad kkin deg umecwar n tegrawla n teslulit.
Necfa daγ i wamek a s-d-sγimen yiḥbiben-nni n ukellex n tegrawla, d wamek a s-undin almi t-nγan.
A la γ-d-qqaren timental n tmenγiwt-is llant deg yimenzayen i yesres di tγerγert n Sumam yeḍran sin n yiseggasen seg mi tebda tegrawla. Anda i tebda ? Deg tmurt n Yiqbayliyen !

Gar yimenzayen-nni :
- tixutert n lecγal n daxel γef wid n berra
- tixutert n uγarim γef userdas.

Aya d imenzayen i γef mtawan akk imwekklen n temnaḍin-nniḍen iḥeḍren Timlilit n Sumam. Bγan ad aγ-γummen iṭij s uγerbal belli Argaz-a ur yettwanγa γef wayen yexdem d wayen i yebγa ad yexdem, maca yettwanγa γef wayen d wamek yella, yettwanγa i-mi d Aqbayli.
Niγ d Ben Yusef ben Xedda, aselway n GPRA a yuran d akken : « asanef n tegrawla tazayrit d urhan n timunent-is ur d-yelli seg unebdu 1962, maca qbel yakan, yella-d seg 1957, seg uzemz n tmenγiwt n Σebban Remḍan »…

Ma nefhem swaswa tadyant-a, ad nefhem daγ tidyanin i d-yeḍran ssinsura, tidak yellan d llsas myal kra n wayen yesɛan rriḥa n uqbayli d teqbaylit.

Tella-d lgirra, tella-d lmut, mmaren yidammen d yimeṭṭawen, yella-d daγen uzarug, timunent n Lzayer…
Maca targit n Yiqbayliyen teffeγ akken-nniḍen. Inaw amezwaru n uselway n Lzayer tilellit, Ben Bella, yeqqar : « Nekni d Aɛraben, nekni d Aɛraben, nekni d imelyan n Waɛraben. ».
Abdar s 03 tikal n wawal « nekni d Aɛraben », amzun d asmekti i wid yettnadin tidet γef tnettit taγelnawt ; d tirirt irzan anadi n Yiqbayliyen yugin yakan tikti n tiɛurbebt.
Deg useggas 1949, llan yimdebbren iqbayliyen ttwakksen seg tsuddest n OS, tasudest taserdasant yettuwekklen i uheggi n tegrawla, llan wiyeḍ twanγan i-mi ttawin tikta n timmuzγa. D aya ay d-issegran s tegrawla iγer yessawel ukabar n FFS deg useggas n 1963, ulin s adrar myal adabu n Ben Bella.

Timunent yeldin s tekriḍt myal tamurt n Yiqbayliyen :

Yerna, aselway Ḥusin Ayt Aḥmed, s yisem n ukabar-is FFS, urğin yessawel i kra yesɛan assaγ d beṭṭu n tmurt niγ i kra d-yesmektayen timanit i tmurt n Yiqbayliyen ; urğin yessuter ula d timsalin yerzan idles d tutlayt n temnaḍt-a. Ula d wid yeffγen s adrar ddaw tecḍat n FFS, ffγen kan akken :

- ad bedden myal tasnareft γef ires udabu irehnen tilelli n Yizayriyen ;
- ad wten γef yir tasertit n wid iḥekmen, d usebded n tugdut i tmurt n Lzayer ;
- ad ḥarben γef tikta tinemlayin d usebded n unagraw ara yesseddun adabu s uzref yezdin merra Ilzayriyen d ugerrez n tudert-nsen.

Neẓra amek ifra ssuq-is :

- afesyan « colonnel » Muḥend Ulḥağ, yuγal γer « l’ANP-ALN » bac ad iḥareb γef Lzayer zeɛma zeɛma myal amnekcam Amerruki ;
- mi d-yerwel Ḥusin Ayt Aḥmed seg lḥebs anda isɛedda 02 n yiseggasen, yerwel i tmurt n Swis ;
- 400 n yimeγrasen d imaynuten i yenkeṛ ar ass-a udabu yessedramen tamurt n Yiqbayliyen d usirem-nsen.

D azref-nneγ ma nesteqsa ad nefhem : i-wacu timnaḍin-nniḍen n Lzayer ur d-fkint tayet i tmurt n Yiqbayliyen a lukan s wawal ? Awwah ! Akk lwilayat ddant d twacult n Wejda. Ma ilaq daγen ad d-nesmekti belli s yiγil ay ddmen imekwan n udabu di tmaneγt.


Гef waya tirirt teshel i tifin. Ilzayriyen ur bγin ad ddun d Yiqbayliyen, i-mi ten-ccukuten d wid ijebbden kan i temnaḍt-nsen ; i-mi ten-ḥesben d wid yettnaγen myal tineslemt ; i-mi ten-ḥesben d ixabiten yeddan d ucengu n Fransa di tallit n tegrawla n 1954.

Nezmer ad nefhem daγ ala tamnaḍt-a a yessawalen i lebni n tugdut d usnerni n tmurt n Lzayer, aya mbeɛd mi tella d nettat kan a yessawalen i tlelli d tmunent di tallit-nni n ṭṭrad ; wamma zzuɛama n temnaḍin-nniḍen llan ddan d udabu ajdid ireṣṣan iman-is s ddraɛ, llan ğğan annar n tsertit bac ur d-zeggun d ugur i lḥukkam ara ireṣṣin tasertit n tiɛurbebt d tibeɛtit.

47 n yiseggasen mbeɛd, 27 n yiseggasen n ukabar awḥid, n tsertit n tiɛurbebt d tneslemt, d uḥebbes n kra n wid ur nemtawi d udabu, d tmenγiwt-nsen tikwal, d usegdel n tlelli n umeslay, 20 n yiseggasen n tesnareft taserdasant iḍerrun ɛinani, d tukkerḍa d tejɛal, d 15 n yiseggasen n rrebrab aderγal, d tmenγiwt n yimusnawen d yineγmasen ; d tmenγiwt seg uẓar n tdamsa d yidles.

Am di tallit n tagrawla n teslulit, tamurt n Yiqbayliyen tewwi tunt-is n lḥif d tguğğelt ; ameγnas amezwaru yettwanγan mačči d menwala : d Taher Ğawet.
Ur nezmir daγ ad nettu timenγiwt n usirem n yilmeẓyen iqbayliyen Maɛtub Lwennas, aseggas 1998, timenγiwt i deg yettikki udabu, ma mačči dγa s lamer-is i t-nγan.

Aseggas n unegzum n leqraya, d tamnaḍt n Yiqbayliyen s lekmal-is ay d-yerran ih i tiγri ; d amelyun n yinelmaden a yugin aγerbaz i sen-yugin tameslayt-nsen tayemmat ; aγerbaz i sen-yugin awwaḍ γer tussna d lefhama, i sen-yugin ad alin i tseddart tamaγradant.
Aya urğin yeḍra deg umezruy n talsa di ddunit γef usuter n usteɛref s tutlayt d yidles ; d amennuγ i d-yebdan 29 n yiseggasen aya.
20 yebrir 1980, akken mi s-ugin lḥukkam i Umusnaw Mulud Mɛemri ad d-yemmeslay γef yisefra iqdimen n Yiqbayliyen, isdawanen n Tizi-Wezzu s tikkin n ugdud aqbayli ffγen s iberdan ; tirirt n udabu d attɛeddi γef lḥerma n tesdawit d uḥebbes n 24 n yimeγnasen ; tadyant-a d tin iwmi neqqar Tafsut Imaziγen, d tin sfugulent yal aseggas merra tudrin tiqbayliyin.

Aseggas 2001, dayen, ṣṣber yewweḍ lḥedd-is, almend n usfugel n Tefsut Imaziγen, yettwanγa usnawi Germaḥ Masinisa deg uxxam n yiğadarmiyen ilzayriyen. Syinna ilul-d Umussu n Leɛruc s tγerγert n Leqser i ḍemɛen ad fken i uqerru n lḥukuma tazayrit. D iseggasen n umennuγ di temnaḍt n Yiqbayliyen bla ma qḍan-d kra ; ala timenγiwt n 124 n yilmeẓyen iqbayliyen s rrṣas n yiγallen n laman.
Ad nissin d akken taneqqiḍt yerzan tamsalt n tnettit (tanaṣlit), tetwaseggra γer tis 08 di tγerγert-nni n usuter s wudem aγelnaw.

Am di 1963, am di 1980, am di 1985 azemz n tlalit n Tdukkla n Yizerfan n Umdan, am di 1994, am di 1998, tanekra urğin tezger tilas n tmurt n Yiqbayliyen ; ama d asuter γef tugdut, niγ γef yidles, niγ γef ugerrez n tmetti, akk timnaḍin-nniḍen n Lzayer urğin d-ddant γer tama n tmurt n Yiqbayliyen. Nnig umgired i γ-yebḍan di tutlayt, yella daγ umgired meqqren deg wudem n tmetti, n yidles d tsertit.

Lgirra i yessenker udabu deg yiseggasen-a ineggura myal tamnaḍt n Yiqbayliyen d ayen i d-yeslalen amussu n MAK (Amussu i Timanit n Yiqbayliyen) ass n 05 yunyu 2001 ; irgazen lxalat, gren-d ad d-afen kra n tifrat ; d imeγnasen imeqranen yettnuγen seg wacḥal aya i ureṣṣi n tugdut di Lzayer d ureṣṣi n tnettit taqbaylit di yal aḥric, d lemqadra gar akk timettiyin n temnaḍin n tmurt n Lzayer ; suffγen-d tikti n timanit i tmurt n Yiqbayliyen.

Ma d ikabaren n tsertit iqbayliyen yenwan reṣṣan di yal tamnaḍt n Lzayer, ulac acu n tifrat i d-fkan ala aserked n yimezdaγ d usanef n umussu γer tama-nsen.
Akabar n FFS yetturar s wawal « régionalisation positive », akabar n RCD s « régionalisation modulable », maca γas akka, i nekni d ayen yelhan i-mi d- skanen γas s ukukru belli tamurt n Yiqbayliyen mačči am tiyeḍ…
Amaray amezwaru ajijli n FFS deg yiwet n tallit akken, yesteɛref tamurt n Yiqbayliyen d aqerru n tmacint deg usemres d usuter n tugdut, maca ur d-yerri s lexber d akken yezmer seg tallit ar tayeḍ ad d-yennser uqerru-nni seg tmacint ma teḥbes tesguma ad taẓ γer zdat.
Aselway n RCD, netta iberreḥ deg yiwet n temlilit ad d-yessufeγ ineγlafen-is seg udabu alzayri, aya 02 n wayyuren mi kkrent tmesbaniyin n tefsut taberkant ; deg temlilit-nni a yenna « Ulac tuffra, tilisa-nneγ banent ».


Ayγer timanit n tmurt n Yiqbayliyen ?

Cwit umezruy i d-newwi nessa-t-id d llsas bac ad d-nesken belli akk irgazen n tsertit n Lzayer, ula d Σebbasi Madani adγa, umnen s umgired yellan gar tmurt n Yiqbayliyen d temnaḍin-nniḍen deg waṭas n tγawsiwin.
Ula d ayen suturen Iqbayliyen ur cliɛen deg-s akk Yizayriyen n temnaḍin tiɛrabawalin ; γas ma llan kra deg-sen yesḥussen terza-ten temsalt, qqaren nneqs, ccukkuten amer ahat d beṭṭu n tmurt ay tessutur temnaḍt-a n Yiqbayliyen, niγ d tiyti myal lislam ; tikwal ccukuten tikkin n wudayen akkd Fransa.

Ala timanit i tmurt n Yiqbayliyen, s uqader n Lzayer s lekmal-is akkd tugna n Uqbayli, ara d-yefken ayen akk yeffud uγref aqbayli.

Acu γef tettnadi tmurt n Yiqbayliyen ?

Taγawsa tamezwarut d asteɛref :

Tamurt n Yiqbayliyen i d-snekren leqrun n umezruy, tefruri-d seg twacult tamaziγt meqqren, am nettat am Yicawiyen, Imucaγ, Imẓabiyen d Yicelḥiyen. Am Tefriqt Ugafa merra, ɛeddan fell-as acḥal d imnekcamen. Amezruy atrar yessemgared tamnaḍt-a n Lzayer γef tiyeḍ, ama di lebni n tugna, di tmeslayt (taqbaylit), di tfelsafit d tγara n tudert (Taqbaylit).

Seg mi tewwi timunent tmurt n Lzayer, tamurt n Yiqbayliyen yefkan iman-is d asfel, tekcem s amennuγ γef tugdut, teḍmeɛ ad d-ddun yid-s yimezdaγ aɛrabawalen n Lzayer bac ad agin tarbaɛt n lɛesker yeṭṭfen adabu s yiγil, ad kkin deg usuter n tnettit tadelsant tamaziγt ; am wakken teḍmeɛ ad d-tesseddu yid-s akk Imaziγen n Tferka Ugafa d ibeddi γef wudem udabu asnaraf, d wudem axwanği yebnan γef tikta n tiɛurbebt d tneslemt yugin asteɛref s tillin n laṣel amaziγ.

Almi d yibrir 1980 a yerreẓ usalu, yeldi-d uzniq i umennuγ yessergagin adabu. D tafsut tamezwarut n Yimaziγen swayes tuki Lzayer s tugti n tmeslayin-is d yidelsan-is. Iqbayliyen ihi slalen-d Amussu Adelsan Amaziγ (MCB) yessuturen asteɛref n timmuzγa n Tefriqt Ugafa merra, di tallit anda win ineṭqen s wawal n teqbaylit di Lzayer tamaneγt, ad t-refden γer lḥebs.
D iseggasen n umennuγ, aseggas n unegzum n leqraya deg yiγerbazen, timenγiwt n 126 n yilmeẓyen deg useggas n 2001 i d-yessegran kan s usteɛref n tmaziγt d tutlayt taγelnawt, maca « d awezγi ad tili tunṣibt » a yenna uselway n Lzayer deg wawal-is.

Seg yiseggasen-a n yimenγan i tt-txelleṣ teḥma tmurt n Yiqbayliyen, ar assa mazal-itt iman-is, yerna terna aṭas seg tarwa-s d iseflan abaɛda di tefsut taberkant 2001 anda d iğadarmiyen ilzayriyen a yḍelqen s rrṣas n lgirra γef yilmeẓyen imesbaniyen.
Ma d Iqbayliyen mazal ur fcilen, umnen s lwert-nsen i d-yeğğa umezruy. Iman-nsen, ur zmiren ad refden taɛkumt ẓẓayen n Tferka n Ugafa s lekmal-is. Bγan ad qqimen akka d Iqbayliyen alamma tefna ddunit ; ad idiren s wazalen-nsen d wakal-nsen ; iswi-nsen d asteɛref s tmeslayt-nsen d usnerni n yidles-nsen yeddren d leqrun aya ; iswi-nsen d tilelli ; d talwit d tiẓin γer zdat.

Tugdut

Sin n yikabaren yebnan γef tugdut (RCD-FFS) d Iqbayliyen, s yiselwayen-nsen, s wakal-nsen, s unnar-nsen asertan ; iselwayen n ukabar n MDSL n Hacmi Crif d ukabar n PST n Salaḥ Cawqi d Iqbayliyen, izen-nsen d yinaw-nsen d tsertit-nsen urğin zegren tilas n tmurt n Yiqbayliyen ; kra kan n yimeγnasen-nsen yellan di temnaḍin tiɛrabawalin n Lzayer d Iqbayliyen. Ayen akk ssuturen s wudem aγelnaw urğin yeffeγ tilisa n tmurt n Yiqbayliyen, anda qqnen ay bran.

Talakt : Aferrez gar ddin d tsertit

Neẓra ayen yellan, tamnaḍt anda tineslemt tasertant ur tufi amkan-is di Lzayer d tinna n Yiqbayliyen. Гas Ddula tazayrit tefka aṭas n wallalen amek ad treṣṣi tineslemt-a tasertant, s uγerbaz, s usebded n tdukliwin n ddin, s tiliẓrit d lebni n lejwamaɛ, ayt icumar drusit maḍi di tmurt n Yiqbayliyen.

Di tefranin n dujamber 1991, akabar n FIS yerbeḥ qrib akk tiγiwanin n Lzayer, yerna iḥella-d sennig wayen ilezmen d akursi deg Useqqamu aγelnaw, maca ur yewwi ula d yiwen seg tmurt n Yiqbayliyen. Aya ulamma neẓra d akken lislam yesɛa amkan-is swaswa di tmetti taqbaylit ; qrib yal taddart s ljameɛ-is, maca tudert n yimezdaγ urğin selḥuyen-itt leqwanen n ddin niγ n ayt icumar, lislam d ayen yellan gar umdan d yiman-is.

Afrurex n yinmula (ssandikat)

Anmalu awḥid n UGTA yellan ddaw leɛnaya n udabu yesselḥay merra iḥricen isudar n Lzayer, maca urğin yegra aẓar-is di tmurt n Yiqbayliyen anda i d-ufan ugur sγur inmula ilelliyen yugin UGTA, gar-asen : SNAPAP, SATEF, FNTE, CNES… atg, ula d iqbayliyen yekkin deg UGTA dima d imenγi myal iqerray n unmalu-nsen yellan di tqacuct.

Timanit di tudert n yal ass

Di leɛwayed n yijudda n tmurt n Yiqbayliyen, amdan dima yettkal γef yiman-is, tawattra d letkal γef wiyeḍ, tugart ma γef Ddula, ttwalin-t s yir tiṭ, d lɛib, d lɛar ; ulac γur-sen amkan di tmetti. D amdan s yiman-is a yettikkin di lecγal n wiyeḍ : di Tmecreṭ, Tiwizi, Lewziɛa d Tcemlit. D ayen ara yerren amezdaγ d ilelli, ur yelli wacu ara yerğu seg Ddula.
Seg gar Yizayriyen merra, d nekni s Yiqbayliyen ay deg llan yiminigen s waṭas ama di Lzayer ama di tmura tiberraniyin, akkin i Yilel Agrakal. Timental tigejdanin n yinig d tid yerzan tadamsa i-mi tamnaḍt n Yiqbayliyen tezga-d deg uḍar n udrar n Jerjer, Tizi i tama ugafa, Tubiret i tama n unẓul, tamnaḍt n Sumam, akk d cceṭ n Yilel Agrakal.
Гef waya, ulac γur-s imekwan anda zemren ad afen axeddim, yeqqim-asen-d ala yinig (lγerba). Гur-s kan ala tiγiwanin, ddayrat d lwilayat ixeddmen γef udabu s usemres n tukerḍa d lḥers γef yimezdaγ n tudrin.

Lebni n yiγerbazen yella-d γef yiwen n yiswi : ad ɛerrben Iqbayliyen, ad ten-rren d inselmen ; tameslayt n teqbaylit ur tufi amkan-is deg yiγerbazen-nni, ma d tafransist d teglizit sγarayen-itent akka kan.
Ulayγer ad nesseγzef ameslay γef uγerbaz alzayri d leɛyub-is ifeḍḥen s uṛebbi n yirebraben d yimeggufsa. Uccuḍ awḥid deg yecceḍ udabu d lebni n 03 tesdawiyin di Bgayet, Tizi d Tubiret ; i-mi di nniyya-s yettγil dayen ad yeɛzel inelmaden iqbayliyen seg waɛrabawalen a ur ad asen-sderɛen aṭṭan n usuter n tugdut d yidles… Adγa teffeγ-asen tirga mxalfa, maca yufa-yas amek ad yaweḍ iswi-s, aya s usguğğel n tesdawiyin-a s ttawilat ilaqen i d-yezgan ar assa deg wuguren meqqren ; yal tikelt d aneḥbus γef leqraya.

Tameγradant

Iqbayliyen i d-yettuṛebban s cnawi n jiddat-nsen yessawalen i yiseγ d leḥnana ; d uqader d twizi d tcemlit d leɛnaya iwmi rnan imenzayen n tugdut, ay ttnadin d tameγradant, ad ilin s wazalen yezdin akk igduden n ddunit ; ttnadin tudert tatrart d uğğujğğeg bla ma bran i tnaṣlit taqbaylit yeddren d leqrun aya ; mačči am yimezdaγ-nniḍen n Lzayer yeṭṭfen ala di ddin, yettmuqulen kan γer Usammar mačči γer Ugafa.

Amur ameqran n tγamsa tazayrit yuran s tefransist d iqbayliyen ay ten-id-islalen, d iqbayliyen a yettarun deg-sen, d iqbayliyen ay ten-yeqqaren. Sin n yimuren γef krad n yiγriben n Lzayer di Fransa d Iqbayliyen ; amur γef krad n yimezdaγ n Lzayer d Iqbayliyen !

Azal n tmeṭṭut

Idles amaziγ s umata yefka azal meqqren i tmeṭṭut ; drus maḍi n tγermiwin di ddunit a yeğğan tameṭṭut ad teṭṭef adabu, ad trayi γef ugdud-is : Dihya d Tinhinan d tigellidin timeqranin i yessufγen agdud γer tafat s yimenγan myal amnekcam.

Di tmurt n Yiqbayliyen, leɛnaya n tmeṭṭut tezga-d nnig kulci. Anekcum n lislam yessenqes azal n tmeṭṭut s lḥers d lbaṭel swayes yeγli fell-as. Di tmurt n Yiqbayliyen, d lɛib win yuγen aṭas n tlawin.

Tidukliwin i d-slalent tlawin di Lzayer akkit d Tiqbayliyin, « Tarwa n Faḍma n Sumer » d yiwet seg-sent i yuγen isem n temjahedt tameqrant yellan d aqerru n lɛesker myal amnekcam aṛumi, di Micli aseggas 1850.
Timeγnasin timezwura myal lqanun n twacult d Tiqbayliyin. Neẓra daγen tikkin-nsent deg yimussuyen n tlawin tiqbayliyin ama deg yikabaren n tsertit, ama deg usuddes n tikliwin di tefsut taberkant.
Asmi ara tawi tmurt n Yiqbayliyen timanit-is, ur d-yettili umgired gar yizerfan n Urgaz akk d wid n Tmeṭṭut.

Agerruj adelsan d tẓuri

Sennig ugerruj n tutlay, tamurt n Yiqbayliyen tefka-d aṭas n yimusnawen d waggagen d yinaẓuren yettwassnen deg umaḍal, gar-asen Mulud Mɛemri, Ferɛun, Mimuni, d twacult n ayt Σemruc : Tawes, Jean d yemma-tsen Faḍma n at Manṣur.
Qqaren-ten akk di tesdawiyin n ddunit, ma deg yiγerbazen n tmurt n Lzayer yeγba yisem-nsen d wayen uran.
Sliman Σazem, Crif Xeddam, Ayt Mengellat, Idir, Maɛtub Lwennas, Ferḥat, Igerbucen, mačči kan d icennayen inaẓuren iqbayliyen, maca d agerruj adelsan i d-tefka tmurt n Yiqbayliyen i talsa n ddunit merra.
Tenkeṛ-iten tmurt-nsen ama di radyu ama di tiliẓrit almi ula d yiwen seg yiɛrabawalen mačči yessen-iten.

Ala timanit n Ddula Taqbaylit ara ten-yessisnen s nitni s wayen uran d wayen cnan…
Ddula Tazayrit tesmenyif ad tessisen ameddeḥ d cna n Rai, d uṣerref n yimelyan n yidrimen i tmeγriwin n yicennayen n Ccerq Alemmas, d Maser d Lubnan.



Iqbayliyen yellan s tidersi γef waɛrabawalen, ur zmiren, am wakken ur ilaq ara ad ḥettmen ayen suturen γef merra Izayriyen-nniḍen yeddan d wat berra ; nutni iḍefren leɛwayed d wazalen yexḍan timetti n Lzayer. Deg wannect-a daγ ala timanit i temnaḍt-nneγ ay d tifrat.

Ayen yerzan luzinat d wallalen akk n tdamsa, ma nekkes luzin n Wad Σisi d lmerṣa n Bgayet i yebna udabu deg yiseggasen n 70 bac ad yeɛzel daγ Iqbayliyen ur truḥun ara γer temnaḍin-nniḍen, ulac acu n wussisen i yexdem i usnulfu n lexdami d cci. Yerna, luzin-a n Wad Σisi d wiyeḍ-nniḍen ur tufiḍ d acu i d-yeqqimen deg-sen yelha, atna di yir liḥala ; wa yennedram uzgen deg-s, wa yettwakar s tejɛal, wa qqlent-as tewwura ; akka ay teḍra d wallalen n tdamsa di Tubiret d Bgayet…

Yelha ma nesmekta-d d akken luzinat imeqranen i yebna Bumedyen di Rwiba d Σennaba (Lḥeğğar) d Sonatrach yellan d llsas i tdamsa n Lzayer, qrib akk d Iqbayliyen ay ten-yesselḥayen, ay yxeddmen daγ deg-sen, mačči s tin n lemziyya sγur udabu, maca mi d Iqbayliyen a yesɛan tirmit d tussna. Maca, imekwan n tqacuct ur d-ṣaḥen i wi, acku yugad-iten leḥkem. Aya d ayen yellan ula deg uḥric n Lɛesker.
Yerna seg tmenγiwt n Maɛtub Lwennas, d tedyanin n tefsut taberkant akk Iqbayliyen iɛsekriwen yettwakkes-asen sslaḥ, zeɛma a ur ad d-ẓartin s yimrigen d terkaf-nsen.
I waya, mačči d miḥyaf ?

Adabu yeɛwel timenγiwt n tmurt n Yiqbayliyen, ur as-yeğği tadamsa, ur as-yeğği idles, ur as-yeğği tasertit ; tamnaḍt-a tenneɛzal, teγmeq deg yiseggasen n twaγiyin i urğin tessin deg umezruy-is : ulac lexdami, tineslemt ttett deg-s am twekka, leɛyub n tmetti uγen yal azniq ; atta la tettmettat i lfayda n udabu alzayri yeggullen ad tt-yessenger, atta la tettmettat i lfayda n ayt yicumar inselmen yebγan ad tt-rren d akal ideg ara zerɛen ssem-nsen ineqqen leɛqul ; aya merra zdat n wallen n tarwa-s i mazal ttargun s tizzayrit.

Ur nezmir ahat ad nbeddel tudert n Yizayriyen, ahat nexṣer deg umennuγ-a maca iban belli necceḍ deg leḥsab-nneγ i-mi iban nemgarad di tutlayt, di tudert n tmetti, di tsertit.
Ur nezmir ad nesḥettem tamuγli-nneγ i Yizayriyen-nniḍen, am wakken ur zmiren daγen ad sḥettmen fell-aγ tasertit-nsen d tmuγli-nsen ; ad fernen asanfar i sen-yehwan, d tineslemt niγ d ayen nniḍen, nekni ur nezmir ad nerğu wi γ-d-iḍefren d wid i γ-ifehmen.

Adabu n Lzayer yessaweḍ ahat ad yenher am lmal, ad yesrebreb aγref alzayri, maca daγ ula d aγref-a iɛemmed, wa ittḥama wa, di sin yid-sen ugaden-aγ : wa yugad awwaḍ n Yiqbayliyen i tuṭṭfa n ukursi, wa yugad awwaḍ n Yiqbayliyen i Timanit. D Maɛtub Lwenna-s i d-yennan : « … Aqbayli ur iḥekkem γas yeγra yeẓwer… ddwa-s a ncerreg tamurt ad nefru s tura… ».




D ayagi akk ay γef ilaq tamurt n Yiqbayliyen ad tawi timanit-is, ayen ara tt-id-isellken seg nnger. Yestefk γef Yiqbayliyen ad walin amek teddunt temsal, d wamek ara refden iman-nsen s yiman-nsen. D agdud ay nella, γur-neγ azref ad nesɛu Ddula, Ddula ara γ-iḥerzen, ara γ-yefken azal.

Amussu n MAK (Amussu i Timanit n Yiqbayliyen), yebda-tt-id, teqqim-d i Yiqbayliyen akken ma llan ad tt-ssawḍen s iswi.
Nessaram ad as-d-nerr tudert i tmurt n Yiqbayliyen yeɛzizen fell-aγ, ad as-nenğer abrid n tafat, n tugdut, d talakt ; abrid n Teqbaylit, s wudem atrar d amaγradan.



Tasuqilt i teqbaylit sγur Nacer MEDJDOUB

Azul fellawen merra ,

Tanemmirt i MEDJUD Naser i wedris-a , c'est une fièreté pour moi d'avoir un tel homme dans nos rangs , une nouvelle qui plaira beaucoup à Ferhat MEHENNI , quant à moi je vais tout de suite aller boir une bière à la santé de ce grand homme(MEDJUB NASER)!

Félicitation a NASER !

NASRI Massinissa
Adjoint du secrétaire national aux perspectives économiques.
Chef de la section MAK Aokas.

Message de Sam


Azul
J'ai lu avec interet ton message, ma conclusion est la suivante : AUTONOMIE POUR LA KABYLIE, VITE !!!

Nacer a besoin de soutien pour éditer ses oeuvres