Timlilit Lwali n Bgayet d tdukla Tidmi Gar lebyi d tezmert

Aseggas yettawi-d wayeḍ, ugur yefran yeslul-d wiyaḍ. Akka ay teḍra i uselmed n tmaziɣt seg wasmi i yebda deg useggas 1995 deg twilayt n Bgayet.

Aseggas-a, imi snat n temliliyin i d-yellan d tnemhalt n usegmi n Bgayet, sin n yinejmuɛen rrif n tenmehla s yiselmaden n tmaziɣt ; kra ur t-id-tefri, terra-tt i uṛeggem kan. Ar melmi ? Γef waya, tebges tdukla n yiselmaden n Bgayet “Tidmi”, sutren deg lwali Mass Ali Bedrici akken ad t-walin, ad ẓren ma yezmer i kra ara d-yefru ula d netta.

Tidukla “Tidmi” ur tumin ara ; yessawel-asen-d lwali ɣer temlilit i d-yellan, iḍelli lḥedd ɣef 11 n ssbeḥ. Akken yebɣu yili, i tikelt tamezwarut, deg tmurt n Lezzayer, ad yemlil lwali d yiselmaden n tmaziɣt, ad mmeslayen ɣef wuguren d ttawilat i ilaqen i uselmed n tmaziɣt, d ayen yelhan yakkan, d ayen ara yeldin tiwwura i usirem. Ur ntettu ara, isquma n twilayin am win n Bgayet am win n Tizi Wezzu am win n Tubiret, ɣas ma yella cennun-d ɣef tmaziɣt, leɛmer yiwen seg-sen yeldi tiwwura-s i yiselmaden n tmaziɣt ad walin anda yewweḍ uselmed d wanda i tt-yuɣ; wi nneɣ, d nekni i ten-id-yesbedden!

Ameslay yezzi ɣef wuguren n les postes budgetaires ama wid n yiselmaden imi aṭas n yiɣerbazen ur sɛin tamaziɣt, ama d wid n yimasaḍen imi ar tura yella yiwen kan i twilayt n Bgayet. Daɣen, tessuter tdukla “Tidmi” deg lwali n Bgayet, Mass Ali Bedrici, ad ṭṭebqen akken ilaq les circulaires i d-yettawḍen seg uɣlif n usegmi, imi akken twala mačči deg leqwanen i tt-yuɣ uselmed n tmaziɣt meɛna deg uṭebbeq imi wid yellan dge tenmehla, wa ur yebɣi, wa ur yeẓri amek, wa ur yezmir, wa ..., lḥasun, tuɣ-itt tmaziɣt gar yifassen-nsen!