Aderyis,neɣ amek ttmagaren yeqbayliyen tafsut

...ADERGIS...

Ajeǧǧig uderyis (thapsia garganica)



Aderyis,neɣ amek ttmagaren yeqbayliyen tafsut

Di tmurt n yeqbayliyen, amezwaru n tefsut yettas-d ass n 28 di fuṛaṛ n yal aseggas. Yal mi ara d-taweḍ tefsut, Iqbayliyen si zik-nsen ttmagaren-tt s lferḥ ggaren-as irebbi , ttheyyun-as ussu.

26/02/2011 - 12:45 mis a jour le 01/03/2011 - 18:23 sɣur Crif Wanuɣi

Ass amezwaru n tefsut d ass n tmeγra di yal tamiwin n tmurt yeqbayliyen. Tuget skaren deg-s imensi γef demma, llan daγen wid itteffγen d igrawen γer yigran akken ad ẓren agama zegzawen, yettwareqmen s yijeǧǧigen yefsan.

Iqbayliyen ttmagaren tafsut s uheyyi n yimensi i wumi qqaren : "Aderyis". Aderyis, d isem n yiwen n yimɣi i d-yettemɣayen di teẓgi. Imɣi n uderyis deg-s ddwa i imuḍan irennu di tezmert n wemdan. Γef waya, tteggen s yes imensi i deg ara ččen akk wat uxxam.

Ddurt weqbel, Iqbayliyen ttmeslayen, ttemseqsayen ɣef usfugel n tmeɣra n uderyis. Llan wid i tefɣen ɣef yigran d iḥerqan akken ad d-ɣzen iẓuran n uderyis. Am akken daɣen i llan wid yesmenyafen a t-id-aɣen ɣer warrac yettbaddaden ɣef tewwura zznuzent di timuqinin.

Mi d-teḥder tmeddit, tulawin heggant seksu, ad seqbubcent leḥwal: lbaṭaṭa, ibawen, ẓẓrudya, lḥemmeẓ, akked wayen nniḍen.
Ad ṣfurrent akk ayen yellan deg useksut yersen ɣef teccut n waman irekmen; zdaxel-is timellalin akked iẓuran n uderyis.

Iqbayliyen ssaramen aderyis d win ara d-yassen ddwa, ara d-yeǧǧen tazmert i twacult-nnsen. Am akken zzgan ttweṣṣin win yeččan ur yettes aman.
S waka Aderyis ad yezri di talwit d liser akked tezmert i wid i t-yeččan.

Yettemgirid usfuqgel n tefsut si tama ɣer tayeḍ, maca iswi yiwen: d amager n tefsut. Nessaram d ansayen ara d-yuɣalen ɣer tuddar i deg ttwattun, akken qqaren Iqbayliyen-nni n zik: " ṭṭfet tisura teldiḍ tiwwura.
nadit ɣef tneggura, tḥarbem ɣef tmezwura". Akken yebɣu yili insayen n wegdud d iẓuran-is.