Belqasem Sikadir i Tiɣremt-La Cité : « Sey-a ɣer sdat ad ttruḥuɣ ɣer tfaskiwin n tmedyezt ».

Ma yella yiwen ur d-yettbin deg kra n tegnatin ur as-qqaret yeffer, ahat yettraǧu kan win ara as-iwehhin afus akken ad yesɛeddi ugur-nni ad t-yeǧǧ ɣer deffir. Akka am Belqasem Sikadir, amedyaz i yeččuren d iḥulfan ed tidet. Newwi-d awal yid-s ɣef tmedyezt s umata, hatan wayen i d-yellan gar-aneɣ !


Mmeslay-aneɣ anwa d Belqasem i win ur k-nessin?


Sikadir Belqasem, Ad d-iniɣ d yiwen n yilemẓi i ilulen di taddart n Ccerfa, taɣiwanṭ n Tizi n Tlata deg Yiwaḍiyen.


Amek yettwali Belqasem tamedyezt?


Tamedyezt d ttawil s i d-yessufuɣ umedyaz iḥulfen-is d wayen iḥulfa ɣer wiyeḍ, ɣer medden i t-icuban.


Skud teɣɣareḍ tamedyezt tazwawt tatrart ladɣa deg faysbuk, acu tenniḍ ɣef uswir-is?


Aswir n tmedyezt akken walaɣ, simmal yettnarni s tmuɣli n umedyaz, acku limer netta (amedyaz) yekseb yir tamuɣli tili ad yefcel. Yerna tura, seg wakken llanṭ ugar n tdukkliwin tidelsanin tigreɣlanin, grent tamawt i tmedyezt taqbaylit neɣ i yidles aqbayli s umata.


Ma nenna-yak ma tufiḍ ḥedd neɣ uhu, ad ak-iɛiwen deg wannar-a n tẓuri. Acu ara d-tiniḍ?



Ulac win yufan yugi , maca llan wid i d-yefkan afud akked tebɣest iwakken ad qedceɣ di tira ladɣa. Zik lliɣ ttaruɣ i yiman-iw am akken qqareɣ-as ixus wayen xeddmeɣ , ass mi kecmeɣ di tmussni n yimdukkal ibeddel waya. Ad snemmreɣ dɣa nezzeh Taninna tacennayt i werǧin tebεed fell-i deg uḥric-agi yal ass, tetteẓẓu tabɣest deg ul-iw. ad rnuɣ ad snemreɣ Yasin Caɛban, Lwiza Nait Ḥammu, Nasima Taqbaylit, war ma ttuɣ Murad At Weḥmed, Yasin Ayt Ɛebderreḥman, akked Allas di Tlelli win iyi-d-inudan iwakken ad iliɣ deg udlis i d-yellan d tajmilt i Kaṭiya Bengenna. D waṭas n yimdukkal ed temdukkal nniḍen yal yiwen s yisem-is.


Acimi ur tettekkayeḍ deg tfaskiwin n tmedyezt?


Ahat acku nekk ed wakud werǧin nemyufa (yettaḍsa), yal mi ara d-tili tegnit i tal tafaska ad d-brurrgen yiɣeblan ed wayen i d-yettarran zzerb i tikli-w.


Maca akken yebɣu yili, tafaska d axxam n umedyaz, yewwi-d tili trezzuḍ fell-asent...


D tidet. Ma zemreɣ ad d-iniɣ ahat d aɣan, ilaq i umedyaz ad yili di tfaskiwin. Maca akken qqaren « skud nedder rrbeḥ ur ifut ». Ad iliɣ din sey-a d asawen.


D acu d idlisen i teɣɣareḍ?


Ḥemleɣ idlisen n teqbaylit ladɣa isefra iqburen n teqbaylit, am udlis i yura mass Lmulud At Mɛemmer, akked udlis deg i d-yejmeε isefra n Si Muḥ Umḥand.


Ahat tesɛiḍ isenfaren, wissen d ammud n yisefra?


Tura akka ttheggiɣ adlis n yisefra. Ssarameɣ ad iyi-tserreḥ tallit ur yettεeṭṭil ara ad d-yeffeɣ. Am wakken diɣen uriɣ tizlatin s yimeslayen d uzawan d ayla-w, anida rriɣ tijmilin i kra n yinaẓuren n ccna taqbaylit : Slimane Azem - Lounis at Menguellet - Matoub Lwennas - Zedek Mulud akked Nwara. Tella daɣen tezlit deg rriɣ tajmilṭ i tqendurt n leqbayel, azamul n ṭyemmatin-nneɣ. Ssarameɣ ad ilin wid ara tent-yecnun, ayɣer ala ?


Ma yella wamek, awi-aneɣ-d kra n tseddarin n yiwen seg yisefra-k…


Atan di lebɣi-nwen, seg usefru « Taqendurt » :
Sser ɣur-m yettquddur
Fell-am mi d-yeɣli umzur
Tefkiḍ i ugdud isem
Tεebbaḍ lehwa d acarcur
Terniḍ aḥriq d uzemmur
Ijifer-im muḥal yegzem
D kem i yeṣren amur
Win akken d-yefkan leḥrur
Nnig udrar yuli ccen-im.

Ɣer tala tεeddaḍ di ṭlam
Yiwen ur yennul ayla-m
Ɣef yijlal-im yedda leḥder
Tqedceḍ lexla axxam
Tbubbeḍ ammus d lhem
Ula akken ur yeɣli leqder
Σeddan wussan d leεwam
Ḥḥed ma iεedda lḥarma-m
Win iεeddan iẓri-s yuder… ».

Tanemmirt a Belqasem, ma llan kra n yisteqsiyen tebɣiḍ ad ak-ten-id-fkeɣ, ini-d...


Taggara : ssaramaɣ afud iǧehden i yal win neɣ tin iqedcen ilmend n yidles aqbayli, taqbaylit d nukni i d arraw-is, d aɣan daɣen azref fell-aɣ ad tt-nesnerni. Taqbaylit deg yiles, ad yennerni yidles. Tanemmirt i kečč a Mhenni di leqdic-ik, akked tmedyezt-ik igerrzen. Tudert i Tiɣremt-La Cité.



Yesteqsa-t : Mhenni Xalifi