Hommage à Abdelkader Bouhi

BGAYET
**********

Bgayet a tamurt-iw
A tin εzizen ɣef wul-iw
Ur zmireɣ ara ad kem-ttuɣ

Dinna ay sεeddaɣ temẓi-w
Gar leḥbab d lǧiran-iw
Mazal fell-awen ad cnuɣ

Boulevard Biziou umali
Tin iceεlen am lefnar
D asawen rnu nadi
Ḥewwes-d La Rue du vieillard
Γer imuṭan steqsi
Ccfa i wi yellan deg sbiṭar

(Refrain)

Zigwaṭ akked lmersa
Allah anta leɣwabi
Ali ɣer Yemma Guraya
Ṭṭef-d abeḥri lεali
Ttsellimeɣ ɣef LACIFA
I iqubel Sidi Wali

(Refrain)

Abrid-ik syin d aqibal
Ttxil-k ay itbir ucbiḥ
Seww-d aman di lεin Ḥerrar
Ttsellim ɣef lḥum rriḥ
Abrid-ik syin d aksar
Ḥumet Bazin steεfu rtiḥ

(Refrain)

Ay amsafer i iruḥen
Sellem-iyi ɣef Ddar Naser
Sidi Ḥmed win εzizen
Iɣil lberj i iqubel lebḥer
Tala Weryan ifazen
Deg uεemriw ḥbes qesser

(Refrain)

Deg yimezzayen ɣer wemṭiq
Ẓer-iten yiwen yiwen
Asmi akken rrsas yeṭṭerṭiq
D nuhni i d imjahden
Nufa-ten deg teswiεt n ddiq
Wesseε a llah di lǧennet-nsen

(Refrain)

Deg lexmis ɣer katcman
Γer yiɣil uεezzug εeddi
Iḥeddaden akken ma llan
Γur-sen ulac astehzi
Xeddmen lqima i ufennan
Deg wacu lliɣ nekkini

(Refrain)

Sidi Mḥend ameqqran
Ḥareb fell-aɣ s lqewwa-k
Sidi Σebdelqader εzizen
Ḥerz-aɣ ya nekni d tarwa-k
Tessneṭ Bgayet d irgazen
Ur ttbeddilen ssifa-k

(Refrain)

ANDALA-TT ANDALA-TT

Andala-tt andala-tt
Tinna i izedɣen ul-iw
I wayeḍ fkan-as-tt
Σedmen-iyi temẓi-iw
Andala-tt andala-tt
Ḥudreɣ-tt am wul-iw
I wayeḍ fkan-as-tt
Σedmen-iyi temẓi-iw

Ini-d ma tecfiḍ
Ussan iεeddan
Lferḥ d lemḥan
Nekni akken nzehhu

Ini-d ma tezhiḍ
Ar wanida i kem-fkan
Neɣ fell-i ay terɣiḍ
Uɣaleɣ-am d asafu

(Tasetna)

Ula d imawlan-is
Ay i bɣan d idrimen
Muddeɣ-as llsas-is
Ggumman ad yi-tt-fken
Σedmen-as temẓi-s
Tεac deg uxemmem
Ayen yebɣa wul-is
D nuhni i as-t-igzemen

(Tasetna)

Ad am-ṭelbeɣ ccerṭ
Ccerṭ fell-am d afsas
Amezwaru-inem
Γef yisem-iw semmi-yas
Kul mi ara t-tlaεiṭ
Lḥubb-iw ad d-yas
Ass-nni ad yi-temmektiḍ
A lexyar n tullas