Llaz ( La famine)!

Llaẓ yuɣ tasga s nnmara-s tafuhrit deg tallit-nni. Ctaqen medden ad ččen ad rwun. Maca, ɣas iɛebbaḍ d ilmawen, iẓerman ttmesččawen, imdanen xeddmen nnif, sskanayen-d udem yeḍsan. Yal yiwen, ad

s-tiniḍ yečča yerna yerwa s tawant, yettban-d amzun ur tufiḍ d acu i

t-yuɣen.

D lqella n tgella yesḍulin yal ass i yal amdan i yessuffuɣen taxelqit n Rebbi ɣef lexlawi. Uɣalen yimdanen kessen am tɣeṭṭen. Yal taḥcict yellan ɣur-s aman ẓiden am tifaf, waḥrir neɣ ẓidlmum, ad ɣlin fell-as d aqlaɛ. Ggaren-tt ɣer yimawen-nsen werɛad tirad acku win yelluẓen ur yeṭallay ara ɣer tezdeg, yettnadi kan ad yaf s wacu ara yessedhu akerciw-is yelluẓen.

Yiwen urgaz yuɣal-d seg “tkessawt”, icenfiren-is merra d izegzawen. Iban yečča-d tirec n tuga. Yedda kra, immuger-d tarbaɛt n yimeddukal-is. Teddun ɣer wansa i d-yekka. Ula d nutni yessuffeɣ-iten llaẓ ɣef lexlawi. Imi d-wwḍen ɣef yiri-s yenna deg wul-ines : “ Wigi ad ten-kelḥen akken ma llan, ad rwuɣ taḍsa deg-sen akken i d-rwiɣ taɣeddiwt“.

- Anida i tetteddum akka? i sen-yenna.

- Amzun ur twalaḍ ara anida i yettawi ubrid-a ma mačči ɣer tferkiwin n taddart-nneɣ i s-yerra yiwen deg-sen.

- Nekk ẓriɣ anida yessuffuɣ ubrid-a, d kunwi ur neẓri ara anwa i ixedmen tameɣra ass-a, isseččay lɣaci deg yal tagella i d-yefka Rebbi, yefreḥ nezzah acku izweǧ-as i mmi-s amenzu.

Kra deg wayen akk i sen-yenna ur yelli, d asnulfu kan i t-id-yesnulfa.

Imdanen imeɣban, imawen ččuren-d d imetman, teddun d ildayen, ifassen ṭṭfen iɛebbaḍ, neṭqen-d ɣef tikkelt:

-Anwa? Anwa i iseččayen?

-Dda Caɛba n At Wulmu Ufella, i sen-yerra s taḍsa.

Mazal ur d-ifukk ara awal tarbaɛt n twaɣit tuzzel am tbuciḍant metwal axxam n tmeɣra, axxam n Dda Caɛban, ɣer deffir ala aɣebbar i d-yeggran.

Argaz yeqqim yeldi deg warquqen-is, ula d netta mazal-it yelluẓ.

Yenna deg wul-is:

- Asmahat d ṣṣaḥ, Dda Caɛban n At Wulmu inawel…

Mazal ur d-ifukk ameslay yekkes arkasen-is, yerna ula d netta deffir n yimeddukal-is i ikelleḥ ad yečč seksu d weksum…

http://aghucaf.wordpress.com/2012/08/12/la%E1%BA%93/