Aweqqas, timlilit n sed 6 tuber 2018. Ad d-nemmeslay ɣef tsekla s wawalen n tsekla.

Aller en bas

Aweqqas, timlilit n sed 6 tuber 2018. Ad d-nemmeslay ɣef tsekla s wawalen n tsekla.

Message  Azul le Lun 8 Oct - 17:24

Aweqqas, timlilit n sed 6 tuber 2018.
Ad d-nemmeslay ɣef tsekla s wawalen n tsekla
.


Ɣef 9 n ṣṣbeḥ i newweḍ, nekk, baba d Koussayla, ɣer sdat tewwurt n ”Axxam Adelsan Slimane Rahmani” n Uweqqas di Bgayet. Yemmugger-aɣ-d Mouloud Tiakout, dɣa neddukel akken ɣer Melbou ad d-nawi Youcef Achouri i yewwḍen ɣer din iḍelli-nni. Imi ɣef 2 n tmeddit i tella temlilit, nfuṛes tagnit nmerreḥ cwiṭ deg tzenqatin n temdint. Yessumer-aɣ-d Mouloud Tiakout sin n yimukan, yenna-d ilaq ad ten-id-iẓer kra n win ara d-yerzun ɣer Uweqqas.
Amezwaru d amezgun, yezga-d deg udrar, nnig Uweqqas, yebɛed cwiṭ ɣef temdint (yesmekta-yi-d amezgun “Agraw n Taos Amrouche” i yellan di taddart-iw Tigemmunin, at Wasif), d amkan igerrzen, icebḥen, yettak abeḥri i turet. Tanemmirt i at Uweqqas i t-yebnan !
Wis sin, d abrid aqdim deg uẓru n udrar i wumi qqaren “Cap Aokas” i xedmen “Les Ponts et chaussées” di 1864/65. Yezga-d nnig “La grotte merveilleuse”. Ners-d seg “ufurgu” n Koussayla, tqubel-aɣ-d Aweqqas, dɣa terra tmuɣli srid ɣer temdint akked ubrid ahrawan i yellan gar-as d yillel agrakal. “Refdeɣ allen-iw s igenni tefrari-d tafat, serseɣ-tent ɣer lqaɛa yeɣli-d fell-i ṭṭlam, rriɣ-d nnehta s Wurfan, dɣa suɣeɣ nnig tmedlin : a lwexda iṣaren, tawennaḍt meskint, rnan-tt wafraḍen, tezdeg d ccbaḥa wissen ma ad d-zzint ! Wicqa, ttif ad nezɛef wala ad nayes (i d-nnan), ad nezwir deg wayen i neḥwaǧ imir-a wammag lebɣi-nneɣ meqqer ! Yekfa lawan n umerreḥ iseg d-nezdem lqerḥ akked lferḥ : nennuɣna imi nufa tacmat deg temdint icebḥen, nefreḥ imi nḥulfa i lebɣi n yiɛeggalen n “Azday Adelsan n Weqqas” ad ṣeggmen taswiɛt, ad sseddun lecɣal akken iwata lḥal. Afud igerrzen ay imeddukal ! Nṣubb-d si “Cap Aokas” srid s asečču, nemlal-d kra n yimeddukal, nečča talqimt, nqeṣṣer cwiṭ, neswa leqhawi, dɣa uɣeɣ-d aɣmis “La Cité” ideg d-tedda tdiwennit Hafit Zaouche.
S wazul n tegmat d tdukli i tebda temlilit iɣer d-rzan yimeddukal Mhand Chemirou (tasnawit “Abderrahmane Illouli” deg at Yiraten 1980-83), Mokrane Chikhi, Larbi Yahioune, Nabil Mehdioui d twacult-is akked wiyaḍ (virtuels) n FB. D azul aḥmayan -ulamma yelha lḥal- i d-ssawḍeɣ i at Uweqqas d yinebgawen n lḥerma sɣur at Tgemmunin d tudrin i as-d-yezzin deg at Wasif. Teḍfer-it-id yiwet n ddqiq n tsusmi ɣef yiman n Abdellah Hamane i aɣ-yeǧǧan aggur-a yezrin.
Yezwar Youcef Achouri s awal ɣef tira s umata ladɣa tira n wungal i d-yessefhem i yinebgawen n lḥerma yellan dinna imi netta yesɛa tarmit deg wannar-a. Ayen yura d wayen i d-yessaẓreg yefser-it-id sdat-sen s teqbaylit timserreḥt, yerna-d agzul n wungal-is aneggaru “Ixef n usennan” i as-d-yessuffeɣ yimsiẓreg “Atfalouna” n Firas Eldjahmani s tallelt n umeddakel Hamid Bilek. Yufa 4 n wallalen i ilaqen i tira : tutlayt, tikti, asugen d usenfar. Yessumer-d imir-nni Nabil Mehdioui tasuqelt d allal wis 5 iɣef d-yemmeslay ula d Mokrane Chikhi mi i t-id-iṣaḥ wawal. Mwatan merra ɣef waya.
Ma d nekk, awal-iw n tazwara d tajmilt i yimsuddsen n temliliyin-a yettilin deg kra n tudrin akked tɣiwanin yecban Bouzeguene, Ouacif, Abizar, Aokas, Tizi-Ouzou d Boudjellil (d timliliyin ideg ḥeḍreɣ kan i d-bedreɣ) i yettakken awal i yimyura, i iḥerzen tira am wakken i ḥerzen yimezwura tutlayt s timawit. Syin akkin, d awal ɣef tɣuri (taḥerfit, i tifert n tɣuri, i tezrawt) ; ayen i tt-yeṭṭafaren (tazrawt, tasleḍt d tezɣent) ; ccbaḥa n uḍris ; taseddast ; aktawal ; amawal yerzan awalen imaynuten (Abdelaziz Berkai / Mohand Mahrazi / Samia Saad Bouzefran / Kamel Bouamara / Mohand Akli Salhi… Abdelmalek Meniche) ; allalen yecban timliliyin tiseklanin neɣ isikwan n tira (atelier d’écriture am win n at Wasif) ; isulal yecban idlisen n Zahir Meksem d Mohand akli Salhi ; i d-zzewreɣ qbel ad d-mmeslayeɣ ɣef udlis-iw “Asnekwu n yiḍrisen deg wungal Tawaɣit n tayri n Abdellah Hamane”, d “Tajmilt s udlis” i rriɣ i Dda Abdellah ɣef wayen yura.
Am wakken nennum, mi yekfa wawal, nbudd kra n yidlisen i yimeɣriyen, neṭṭef-d kra n tewlafin i ccfaya, nečča daɣen tiẓidanin n Massa Mehdioui i d-yesferḥen at iɛebbaḍ yexwan. Tanemmirt a Massa. Di taggara yessefk ad rren yimyura tiɣri i yimsuddsen n temliliyin-a anda ma llant, ilaq ad asent-rnun afud, ad mrafaqen iwakken ad reṣṣint tira d tɣuri deg tudrin, ad tennerni tsekla, ad taweḍ i wid i d-yetteddun akken iwata lḥal.
Taɣuri igerrzen, @r tayeḍ ihi !

Ramdane Abdenbi
avatar
Azul

Nombre de messages : 21096
Date d'inscription : 09/07/2008

Voir le profil de l'utilisateur

Revenir en haut Aller en bas

Revenir en haut

- Sujets similaires

 
Permission de ce forum:
Vous ne pouvez pas répondre aux sujets dans ce forum