Inauguration de la stèle Matoub Lounes à Souk El Tenien 20 avril 2017

En hommage à MATOUB Lounas.
Tajmilt i unazur Meԑtub Lwennas.
Ma nmuqel ɣer umezruy n Yimaziɣen, d wayen i d-wwin i tɣarma d yidles alsan, ad naf aṭas deg-sen i d-yufraren deg yal taɣult. I wakken ur ttruḥen d iseflan n tatut, tasuta n wass-a, yessefk fell-as ad tserhu yal yiwen deg-sen.
Taɣiwant n Letnayen, yeḥsan d acu d azal n umennuɣ, azal n tmussni, azal n umezruy d wazal n tẓuri, teddem-d yiwen unaẓur gar wid i d-yufraren d wid yefkan tudert-nnsen d asfel i wakken ad yidir yidles amaziɣ, akken ad as-terr tajmilt : wagi d Meԑtub Lwennas, win iwmi neqqar "Aɣewwaɣ". I usmekti, Lwennas Meɛtub ilul ass n 24 yennayer 1956, di Tewrirt n Musa, deg Wat Dwala. Asmi yesmed 22 iseggasen di leԑmer-is, yegra aḍar-is deg uḥric aẓawan d ccna, anda i d-yessufeɣ tizlit-is tamenzut "Ay izem", deg useggas 1978.
Seg yimir ur yebra i tezlit almi d asmi i t-nɣan ayt tmegraḍ ass n 25 yulyu 1998. Ilaq ad nesmekti dakken yeğğa-d azal n 36 n tesfifin, anda iḍrisen-is ttmesslayen-d ɣef tmaziɣt, tugdut, tayri, tilelli, amezruy. Mačči d abrid neɣ sin i yendef, mačči d abrid i yettwaḍlem : ayen i as-yeğğa udabu, ikemmel-as rrebrab.
Ilaq ad nesmekti daɣen Meԑtub Lwennas d mayaru. Deg 1994, yura-d yiwen n udlis s tuttlayt n tefṛansist, iwmi yefka azwel “Rebelle” , ɣer tezrigin n Stock, Paris, 1995. Ilmend n wayen yeqdec, aṭas n tddukkliwin d tuddsiwin i as-yerran ccan s waṭas n warrazen. Gar warrazen-a, nezmer ad nebder : Arraz n Timektit (Le Prix de la Mémoire), Arraz n Tenfalit n Tlelli (Le Prix de la Liberté d'Expression), Arraz n Ṭaher Ǧawut (Le Prix Tahar Djaout) Ayen i d-yenna yiwen ɣef unaẓur yecban Meԑtub Lwennas, drus. D acukan ɣer taggara, nezmer ad d-nini, akken i d-yenna netta deg wawal-is: "Assa-agi lliɣ, azekka wissen Nniɣ-d ayen ẓriɣ D wayen a ttwaliɣ Cfut di targa ma ɣliɣ D anza-w ad wen-d-yessiwlen ".
Letnayen (Bgayet) ass 20/04/2017.